بیر یانلیش اینانج دیپلماسی ساحه سینده - آیدین تبریزی
باي بک آذربايجان | آنناآخشامي, ۱۴-ي گؤلن آی , ۱۱۰۰۶ اینجی ایل, چولا ۰۵:۳۹ | مقاله
| عزیز دوستوموز، جناب صبری بو نظرین قارشیسیندا بیر نئچه مساله یه اشاره ائدیپلر کی چوخ اونملی دیر اونلارا بیر دقتلی باخیش سالاق. تاسفله بیزیم میللتین آراسیندا بیر گوجلو عقیده وار کی بوجور فرض ائدیر کی آمریکا و غرب اولکه لری بیر فوق بشری بیلگی و قدرته مالک دیرلر کی اونلارین هئچ بیر یانلیش دوشونمه لرینه اینانمیرلار و تئز بو نتیجه یه چاتیرلار کی حتما بو یانلیش، اوزلری ایسته دیگی مساله |
[1] news.bbc.co.uk…
بیلدیگینیز کیمی کئچمیش گونلرده بی بی سی نین سایتیندا بیر نقشه یاییلمیشدیر کی اوندا غربی آذربایجان، کوردلرین یاشادیغی بیر بولگه تانیتدیریلمیشدیر! منجه بوجور مساله لر بیزیم تشکیلات لاریمیزین و اوندان اونملی سی بیزیم گونشو اولکه ده کی سویداشلاریمیزین (خصوصیله آذربایجان و تورکیه دولت لرینین) ضعیف دیپلماسی سینین نتیجه سینده اوز وئریر. یادا لاپ دقتلی دئسه ک بیزیم تشکیلات لارین دونیا مساله لرینده آز بیلگی لری اولمادان و بو گونشو دولتلر ایله ضعیف ایش بیرلیگی آپارمادان نتیجه اولور.
عزیز دوستوموز، جناب صبری بو نظرین قارشیسیندا بیر نئچه مساله یه اشاره ائدیپلر کی چوخ اونملی دیر اونلارا بیر دقتلی باخیش سالاق. تاسفله بیزیم میللتین آراسیندا بیر گوجلو عقیده وار کی بوجور فرض ائدیر کی آمریکا و غرب اولکه لری بیر فوق بشری بیلگی و قدرته مالک دیرلر کی اونلارین هئچ بیر یانلیش دوشونمه لرینه اینانمیرلار و تئز بو نتیجه یه چاتیرلار کی حتما بو یانلیش، اوزلری ایسته دیگی مساله دیر یعنی اونلار اوزلری ایسته ییرلر کی دونیانی بوجور گوره لر چونکی اونلارین منفعت لرینه باغلی اولان بیر سیاست دیر!
آنجاق همین نئچه ایلده آیدین بیلیندی کی آمریکانین گیزلی سرویسی اوجور کی هالیوود فیلم لرینده گوسترمه یه چالیشیرلار یانلیش سیز بیر سیستم دئییل و بن لادن ۱۱ سپتامبر دا بوتون آمریکانین گیزلی سرویس لرین حقیقتا تحقیر ائتدی! البته اگر بعضی همین فیکیرلی لرین گولمه لی تئوری لرین کی دئییرلر ۱۱ سپتامبر دا سیا (CIA) اوزو الی واریدی قیراغا قویاق!
آما گورک آیا حقیقتا آمریکانین منفعت لری بونا باغلی دیر کی غربی آذربایجان کوردلرین الینده اولسون؟! نئجه کی جناب صبری دئدیلر بیز گرک کوردلری حدسیز قدرتلی بیلمه یک و اونلاری آمریکانین استراتژیک دوستو سانمیاق. تاسفله همین عقیده تورکیه لیلر آراسیندا دا چوخ گوجلودور و اونلار بئله دوشونورلر کی آمریکا ایسته ییر کوردلری بو منطقه ده بیر بویوک گوجه تبدیل ائله سین.
آنجاق حقیقت بودور کی آمریکا یالنیز کوردلرین سلاح لی قوه لریندن اوز دوشمنلرینین قاباغیندا فایدالانماق ایسته ییر. اگر تورکیه دولتی صدام حسینین قاباغیندا آمریکا قوه لریله ایش بیرلیگی آپارسایدی ایندی بو جور آمریکا طرفیندن تنبیه اولمازدی! بو بیر حقیقتدیر کی آمریکا چوخ گوجلو اولسادا منطقه ده اوزونه متحد آختاریر تا آز هزینه و آز تلفات ایله دوشمن لرینه غلبه آپارسین. ایندی ایستر بو متحد کورد اولسون یا تورک یا عرب …
منجه ایندی کی دونیادا کئچمیش گیزلی سیاست لر کی بیز اونلاری چرچیلین سیاست لریله تانیریق داها آز یئری وار. ایندی سیاست بیر آچیق و گوز قاباغیندا بیر مساله دیر. هر کیمسه بوردا اوز یئرین و اوز موقعین تانیسا و پتانسیلین ایشه سالسا باشاریلی اولاجاق و هر کیمسه خیالات لاردا سئیر ائدیب و بیر قیراقدا اوتوروب بوتون دونیانی اوز علیهینه توطئه قورماقدا گوروب هامیا منفی گوزله باخسا و هئچ کیمسه ایله ایش بیر لیگی آپارماسا، نیه کی اونلاری اوز دوشمنی سانیر، بللی دیر کی وضعیتی نه جور اولاجاق!
من بونو سورماق ایسته ییرم کی آیا اگر جناب الهام علی اف واشینگتن سفرینده بو نقشه نی آپاریب و بیر پارا دانیلماز سندلر و مدرک لر ایله برابر جرج بوشون قاباغینا قویسایدی بو یانلیش بو ساده لیکده سیا نین مدرک لرینده قالا بیلردی؟! منجه اولده بو بیزیم تشکیلاتلارین وظیفه سی دیر آذربایجان و تورکیه دولتلری ایله ایش بیرلیگی آپارالار و بو ماتریاللاری اونلارین اختیاریندا قویالار تا اوز مذاکره لرینده اونلاری مطرح ائده لر. ایندی بیز اوتوراق بیر قیراقدا و دئیه ک کی بو حتما آمریکانین سیاستی دیر و بیزیم الیمیزدن بیر ایش گلمز. بللی دیر کی همین کوردلر کی دونیادا هئچ بیر جدی دایاناجاق یئرلری یوخدور، اوز بویوک کوردستان نقشه لرینی دونیادا بیر دانیلماز فاکت کیمی تانیتدیراجاقلار و یئرینده اوز ضربه لرین بیزلره ووراجاقلار.
البته یاددان چیخارتمایاق کی کوردلرین دالیندا فارسلار و ائرمنی لر کی آمریکا دا نفوذ لاری وار دوروب لار. آما ایندی دونیا دیپلماسی سینده کیمسه بیر قطعی سند و مدرک قاباغیندا دورا بیلمز و من اینانیرام کی بو مساله کی سیا غربی آذربایجانی کوردستان تانیتدیریب یالنیز بیر یانلیش اطلاعاتا باغلیدیر کی بیزیم منطقه ده اولان رقیب لریمیز بو اورگانا وئریبلر و بیر دانیلماز سند و مدرک ایله آمریکا دولتینی مجبور ائتمک اولار کی بو یانلیشی دئیشسین. منیم محکم دلیلیم بو مساله یه بودور کی اگر اونلار حقیقتا بیلسه یدیلر کی بو اطلاعات غلط دیر امکانسیز ایدی کی اونو عمومی شکیلده یایاردیلار.
من جناب صبری نین نظرین کی بو دونیادا هئچ نه یی گیزلتمک اولماز تمامیله قبول ائدیرم و یئری گلمیش کن ایسته ییرم بیر اشاره ائدم جناب چهره گانلی نین گوناز تی وی ده مناظره سینه کی هامینین اینامایان گوزلرینین قاباغیندا دئدیلر کی من دوشمنین یانیندا دئیرم کی فدرالچیام و بوردا اوز آرامیزدا دئییرم کی اصلی هدفیم استقلال دیر!؟ آما جناب چهره گانلی دئمه دیلر کی بو نه جور گیزلین سیاست دیر کی بیر تلویزیادان عمومی شکیلده یاییلیر و بو وضعیتده صاباح دوشمن لرین قاباغیندا نه جور اونلارا ایناندیراجاقلار کی حقیقتا فدرالچی دیرلار؟!
آما آخیردا بیر اشاره ده ائله ییم تنقید باره سینده کی بو گونلر آذربایجان مدیالاریندا بیر بویوک مساله یه تبدیل اولوب. منجه تنقید اگر منطقی اولسا و شخص لرین حرمتین ساخلاسا و یالنیز فیکیرلری تنقید ائتسه و بیر منطقی آلترناتیو او فیکرین قاباغیندا قویسا، چوخ دیرلی دیر و هر جدی حرکت حتما گرک اوزون تنقید ائله یه. آنجاق اشکال اوردان باشلاییر کی فیکری تنقید ائتمک یوخ شخصی تخریب ائتمک بیر هدف اولور. من حتی بعضی شخص لری سند و مدرک لی افشا ائتمکلن ده مخالف دئییلم آنجاق اشکال بوردادیر کی تاسفله بعضی لری سیاستی یالنیز تنقید ائله مکده گورورلر و حتی ایلده بیر مقاله کی آذربایجان و منطقه نین گون مساله لرینی تحلیل ائله یه اونلاردان گورمه یه حسرت قالمیشیق! و یالنیز او زامان کی بیر موج تنقید کی تخریب ایله ده برابر اولور باشلاییر، بو سیاستمدارلار تاپیلیرلار؟!
[2] durna.se/aydin…
، بیر میللتین سسی
پرینت
http://www.baybak.com
بای بک سایتیندان پرینت اولوب
http://www.baybak.com/Baybak/?p=1069
یازینین اینترنت آدرسی
یازیده ایشه آلینان اینترنت آدرسلری
[1] news.bbc.co.uk…: http://news.bbc.co.uk/1/shared/spl/hi/middle_east/06/iran_maps/html/default.stm
[2] durna.se/aydin…: http://durna.se/aydin_yanlishInanc.htm
گوروش کاپانیبدی