ياشاسين آذربايجان - Long live Azerbaijan

منجه استقلالچی لار و فدرالچی لار آذربایجان ملی حرکتینین ایکی قانات لاری دیلار کی هر بیری باشقاسینا احتیاجی وار. بیر فدرالچی بونو بیلمه لی دیر کی تکجه بیر گوجلو استقلال ایسته یی آذربایجان ملتی آراسیندا، فارسلاری بیر گوجلو فدرالیسمه بویون ایمه یه مجبور ائده بیلر. اگر استقلال ۱۰۰% دیر و بوگون کو دوروم ۰% دیر، فدرالیسم بیر نقطه دیر بو ایکی حد آراسیندا و هر نه قدر استقلال ایسته یی ملت آراسیندا آرتیق اولسا، بیر فدرالیسمه کی ۱۰۰% یاخین اولا الده ائدیلمه سی نین امکانی آرتاجاق.

گوناز تي.وي دن تشکر ائتمک لازم دیر کی بو حساس گونلرده ان اونملی مساله لردن اولان، استقلال یا فدرالیسم سوروسونو مباحثه یه قویوب لار. من بو زمینه ده بیر نئچه اونملی مساله یه توخونماق ایسته ییرم:

منجه استقلالچی لار و فدرالچی لار آذربایجان ملی حرکتینین ایکی قانات لاری دیلار کی هر بیری باشقاسینا احتیاجی وار. بیر فدرالچی بونو بیلمه لی دیر کی تکجه بیر گوجلو استقلال ایسته یی آذربایجان ملتی آراسیندا، فارسلاری بیر گوجلو فدرالیسمه بویون ایمه یه مجبور ائده بیلر. اگر استقلال ۱۰۰% دیر و بوگون کو دوروم ۰% دیر، فدرالیسم بیر نقطه دیر بو ایکی حد آراسیندا و هر نه قدر استقلال ایسته یی ملت آراسیندا آرتیق اولسا، بیر فدرالیسمه کی ۱۰۰% یاخین اولا الده ائدیلمه سی نین امکانی آرتاجاق.

او بیری طرفدن بیر استقلالچی بونو بیلمه لیدیر کی هئچ میللتین ۱۰۰% بیر جور فیکیرلشه بیلمز. اگر بو ایکی فیکرین آراسیندا کی بیری استقلال ایسته ییر و بیری حاقلارین تانیمادان، بوگونکو وضعیتی قبول ائدیر، بیر وسط فیکر اولماسا، او آذربایجانلیلار کی هر دلیله گوره استقلالی قبول ائده بیلمیرلر، شوونیست لره اوز گتیره جکلر! بیزیم میللتین ۵۰% کی تهران و قزوین و باشقا مرکزی یئرلرده یاشییرلار، چوخ شوونیست لرین تاثیر آلتیندا قالیب لار و منه اینانین، او زاماناجاق کی ایران اولکه سی اهوازین نفتینه مالکدیر، بو بولگه لر ایراندان آیریلماق ایسته میه جکلر مگر کی خیالاتا ایناناق و بوجور فیکر ائدک کی باشارا بیلریک نظامی قوه ایله او منطقه لری ایراندان آییراق! پس اگر بیزیم استقلالچی لار بیر بویوک گونئی آذربایجان یاراتماق ایسته ییرلر کی سرحدلری تهراناجاق گئنیشلنه، آذربایجاندان اونجه الاهوازین استقلال یولوندا چالیشمالیدیرلار! نیه کی او زامان کی ایرانین نفتی اولمایا، تهرانلیلاردا یالواراجاق لار کی آذربایجانا قاتیلالار تا کی یزد یا سمنان کویرلرینه!

اگر بیزیم بیر عاقیللی سیاسی تشکیلاتیمیز اولا کی تئوریک سویه ده فدرالیسمی بوتون ایرانلیلارا (نه فقط آذربایجانلیلارا) تانیتدیرا، بیز باشارا بیلریک مرکزی بولگه لرده یاشایان تورکلری کی استقلالی قبول ائده بیلمیرلر و باشقا میللتلری و عاقیللی فارس قوه لری، شوونیست لرین نفوذونون آلتیندان چیخارتیب و بیر وسط آنلاما ایناندیراق. پس منجه بیر فدرالچی تشکیلات اوز چالیشیقلارینین مرکزین تبریزه یوخ، تهرانا آپارمالیدیر.

آما فدرالچی لاریمیز نئچه اونملی مساله یه دیققت ائتمه لیدیرلر:

بیز گرک هئچ زامان اونوتمویاق کی بیر کامل میللتیک کی مستقل یاشاماق بیزیم دانیلماز حاقیمیزدیر و بیز تکجه بیر گوجلو فدرالیسمه کی بیزه استقلالدان آرتیق منفعتی اولا راضی اولمالییق و بونو هر زامان فارس لارلا مذاکره ده تکرار ائتمه لییک و بو استقلال حقینی آنایاسادا گوجلو شکیلده گتیرمه لییک و اصلا بو ایستکدن کئچمه مه لییک. نیه کی بو مساله بونا بنزر کی بیر قادین بوشانماق و آیریلماق حقی اولمایا!

بونو اونوتمامالییق کی بیز گله جک نسل لرین عوضیندن تصمیم توتا بیلمریک. یعنی فرض ائدک کی بوگون آذربایجان میللتی فدرالیسمه سس وئرسین آنجاق ۱۰۰ ایلدن سونرا بو سس وئرنلرین هئچ بیری حیاتدا اولمایاجاق لار و اونلاریندا حاقی وار اوز ایسته دیگی یولو سئچسینلر و بونا گرک یئنیدن انقلاب لازم اولمایا و آنایاسادا بو استقلالیتی قانونی شکیلده الده ائتمه سینه مکانیزم تعریف اولا. مثلا گرک ایالت نماینده لری رفراندوما سس وئره لر و رفراندومدا میللت باشارا بیله دموکراتیک سویه ده استقلالا سس وئره و مرکزی حکومت بونا بویون ایمه لیدیر. کیمسه نین حقی یوخدور بو طبیعی حقی بیزیم میللتیمیز طرفیندن باغیشلیا! اولا بیلر کی مثلا قبول ائدک کی بو رفراندومون نتیجه سی ۵۱% یوخ ۵۵% ایله بللی اولسون آنجاق بو مکانیزمین اولماقی آنایاسادا گرکلی دیر.

ایکینجی سی بودور کی اگر بیز بیر امتیاز وئریریک، بیر امتیاز آلمالییق. یعنی مثلا اگر بیز قبول ائدیریک کی فارس دیلینی مشترک بیر دیل کیمی اوز دیلیمیزین قیراغیندا اوره نک. فارسلاردا گرک بیر باشقا دیلی کی تورکو، ترکمنی، عربی، کوردی و یا باشقا دیللر اولا اجباری شکیلده اوره نه لر. (بونا دقت ائتمه لییک کی آذربایجان ایالتینده رسمی دیل تکجه تورک دیلی اولاجاق و بوتون مدرسه لرده و یونیورسیته لرده بوتون درس لر تورک دیلینده اولاجاق آنجاق فارس دیل و ادبیاتی بیر درس کیمی مدرسه لرده تدریس اولاجاق) بو ایستک ده بیزه چوخ اونملی دیر و اوندان واز کئچمه مه لییک. نیه کی غیر رسمی شکیلده بوتون فارسلاری مجبور ائدیریک کی بیزیم دیلیمیزی اوره نه لر چون اونلار مجبور السالار بیر دیل سئچه لر ۹۰% او دیل بیزیم تورک دیلی اولاجاق و آیری طرفدن بو مساله، فارس منطقه لرده یاشایان تورکلره کی بعضی لری آسمیله اولوبلار یئنیدن اوز آنادیللرینی اوره نمه یه امکان یاراداجاق. (اگر اجبار اولماسا بلکی بعضی لری اوزلرینی زحمته سالیب اونودولموش آنا دیللرینی اوره نمه یه چالیشمایالار)

بیز بو ایستک ایله کی عدالت باخیمیندان دا بیزیم دانیلماز حاققیمیزدیر، بو کئچمیش ۱۰۰ ایلده آپاریلان آسمیلاسیون سیاستینی معکوس ائدیب و بیر ایکی نسلدن سونرا تورک دیلینی ایراندا بیرینجی دیل اولدوغونا شاهد اولاجاییق! پس بیزیم فدرالچی لاریمیز هوشلاری باشلاریندا اولمالیدیر و نه ایسته دیکلرینی دوزگون تانییب و اونلاردان دالی اوتورمامالیدیلار.

حورمتله

آیدین تبریزي

http://www.baybak.com بای بک سایتیندان پرینت اولوب
http://www.baybak.com/Baybak/?p=4216 یازینین اینترنت آدرسی